كليه العلوم جامعه الاسكندريه

( علوم اسكندرية )

شعب الكلية: بيولوجي و جيولوجي وعلوم طبيعية ببتقسم كالاتى
لطلبة علمي علوم: بيولوجي وجيولوجيا بتختارواحدة منهم وانت بتقدم
لطلبة علمي رياضة: علوم طبيعية وجيولوجيا بتختار واحدة منهم وانت بتقدم بردو

نيجي بقي للتخصص دة بيعتمد على تقديرك فى سنة اولي ولازم تكون كملت 30 ساعة معتمدة عشان تتخصص و35 ساعة عشان تخش تانية وعلي حسب شعبتك يعني لو انت

1. بيولوجي ليك تتخصص: كيميا ، كيميا حيوي ، ميكروبيولوجي ، علوم بيئة ، حيوان ، نبات ، حشرات ، علوم بحار.

2. علوم طبيعية ليك تتخصص: كيمياء ، فيزياء ، فيزياء حيوي ، رياضة ، احصاء ، علوم حاسب ، علوم بحار فيزيائية.
3. جيولوجيا بيبقي ليك: كيميا اوجيولوجيا او جيوفيزيا

خلي بالك لو انت هتفكر في ( كيميا حيوي او ميكرو بيولوجي) لازم يبقي تقديرك جيد جدا

اما لو انت عايز كيمياء يبقي لازم تنجح في مادة الكيمياء العضوية ودي هتاخدها التيرم التاني ودي بتبقي اختياري يعني لو مش عايز كيميا متاخدهاش اما باقي الاقسام دي بتخشها باي تقدير عادي يعني خلاص اتخصصت رئيسي اول ما تخلص تانية بنتخصص فرعي ودة عشان يبقي معاك تخصصين فيزودا فرصك في الشغل والمواد اللي بتاخدها بتتقسم 70% عالرئيسي و30%عالفرعي يعني مثلا لو انت كيميا رئيسي ممكن تاخد كيميا حيوي او ميكرو او بيئة فرعي وتقدر تشتغل بالرئيسي وبالفرعي وهكذا

الاقسام الخاصة: ودول قسمين عندنا بمصاريف 11000 جنية في السنة
1. الميكروبيولوجي الصناعية والكيميا التطبيقية ( Imac )
2. جيولوجيا البترول

ايه الفرق بين IMAC واني اتخصص كيميا رئيسي ميكرو فرعي اوالعكس ؟
هقولك ياسيدي في الIMAC هتاخد 50% كيميا و 50% ميكرو اما في العادي هيبقي 70% رئيسي و30% فرعي ، فرق بسيط فى الدراسة لكن فى الاخر ليهم نفس الشغل بعد التخرج

في مشكلة في علوم اسكندرية وهي ان ليها 4 مباني في مناطق مختلفة: طريقة الحرية ، الانفوشي ، الشاطبي ، محرم بك ، هيجي عليك ايام هيبقى عندك هنا محاضرة و بعدين هناك سكشن و بعدين محاضرة في نفس المكان .. فتفضل بقى رايح جاي يا بطل و فلوسك تخلص على المشاريع :D بس دي بالوقت هتتعود عليها

لمعلومات مفصلة عن دراسة وشغل أقسام كلية العلوم : https://goo.gl/FyfWbb